विनोद घिमिरे, भेरीगंगा
सुर्खेतको भेरीगंगामा सांगीतिक प्रतिस्पर्धात्मक कार्यक्रम “छिन्चु आइडल’ हुने भएको छ । शुक्रवार छिन्चुमा पत्रकार सम्मेलन गर्दै यही साउन २६ गतेदेखि छिन्चु आइडल हुने आयोजकले जानकारी दिएको हो । आइडलका लागि साउन १५ गते (मङ्गलबार)देखि दरखास्त मागिने आयोजकले जनाएको छ ।
उक्त आइडलमा नृत्य र गायनतर्फका तीन/तीन जना छनौट हुनेछन् । जे.एस इन्टरटेन्मेन नेपालगञ्जको आयोजनामा उक्त आइडल सम्पन्न हुने ह्याङ्गल इन्टरटेन्मेन हाउसका निर्देशक रितेश गौतमले जानकारी दिए । उनका अनुसार एक हजार रुपैंया तिरेर गायन वा नृत्य विद्यामा कलाकारले भाग लिन पाउनेछन् ।
आयोजकका अनुसार आइडलमा सहभागी हुन उमेरसमूह तोकिएको छैन । जुनसुकै उमेरका कलाकारले पनि भाग लिन सक्ने कलाकार कमल निर्मोहीले बताए । प्रतियोगितामा नृत्य र गायन दुवैतर्फ तीन/तीन जनालाई एक लाख नगद पुरस्कार प्रदान गरिनेछ ।
आइडलमा छनोट भएका सहभागीहरुलाई आवश्यकता अनुसार उपयुक्त ठाउँसम्म पुयाउनु पर्ने आफूहरुको कर्तव्य भएको कलाकार निर्मोहीको भनाइ छ ।गाउँ ठाउँमा लुकेर रहेको प्रतिभाहरुलाई अनिवार्य खोजेर बाहिर ल्याउनु पर्छ भन्ने मानसिकताका साथ छिन्चु आइडलको आरम्भ गर्न लागेको आयोजकले जनाएको छ ।
ह्याङ्गल इन्टरटेन्मेन हाउसका निर्देशक गौतमले यही साउन २६ गते पहिलो चरणको अडिशन भेरीगंगा नगरपालिकाको सभाहलमा गर्ने गरी तयारी भईरहेको बताए । विकट क्षेत्रमा लुकेर रहेको प्रतिभालाई यस आइडलमार्फत बाहिर ल्याउन सहयोग पुग्ने विश्वास आफूले लिएको बताए ।
छिन्चु आइडलको प्रमुखको जिम्मेवारी विनोद घर्ती मगरलाई दिइएको छ । आइडलमा ७७ जिल्लाबाट सहभागी हुन सकिने आयोजकले जनाएको छ ।