आईतबार अपरान्ह वीरेन्द्रनगरको बसपार्क सामुन्ने बसको ठक्करबाट मृत्यु भएकी बृद्धाका आफन्तहरुले वीरेन्द्रनगर बजार बन्दको आव्हानले सोमबार दिनभर वीरेन्द्रनगर तनावग्रस्त बन्यो । जाजरकोट छेडागाड नगरपालिका वडा नं ६ की नदी रावतका आफन्तहरुले विभिन्न माग राख्दै बिहान ५ बजेदेखि वीरेन्द्रनगरको बसपार्क, मंगलगढि, बुल्बुले चोकमा टायर बालेर सडक अबरुद्ध गरेका थिए ।
आईतबार अपरान्ह साढे दुई बजेतिर अन्दाजी ६६ वर्षिया नदीलाई वीरेन्द्रनगरको सिटी बसपार्क अगाडि कर्णाली प्रदेश पंचकोशी प्रा.लि.को बा.४ ख. ८०६१ नम्बरको बसले ठक्कर दिएको थियो । जेब्रा क्रसिङ्बाट बाटो काट्दै गरेकी नदीलाई बसले ठक्कर दिएपछि घाइते भएको बताईएपनि उनको घटनास्थलमै मृत्यु भैसकेको थियो। उपचारका लागि प्रदेश अस्पताल कालागाउँ पुर्याइएपछि उनको मृत्यु भएको सुर्खेत प्रहरीले जनाएको छ ।
प्रहरीले बसलाई नियन्त्रणमा लिएपनि चालक भने फरार रहेका थिए । फरार बस चालकलाई प्रहरीले पक्राउ गरिसकेको छ । उक्त बसका चालक दैलेख भैरवी गाउँपालिका वडा नं ५ घर भई हाल वीरेन्द्रनगर नगरपालिका वडा नं. ३ बस्ने ३३ वर्षीय खगेन्द्रप्रसाद रिजाल रहेका छन् ।
मृतक नदी वीरेन्द्रनगर नगरपालिकाको वडा नं ११ बामे खोलामा बस्दै आएकी थिइन् । प्रहरीका अनुसार मृतक नदीका एक मात्र छोरा रोजगारीको शिलसिलामा भारतमा छन् । उनका श्रीमानको मृत्यु भइसकेको छ । मृतकका छोरा भारतबाट हिडिसकेको र उनी सोमबार साँझ सुर्खेत पुग्ने मृतकका एक आफन्तले जानकारी दिए। उनका अनुसार छोरा आएपछि थप छलफल गर्नेगरी हाललाई जारी आन्दोलन स्थगित गरिएको छ ।
यसैबीच, आन्दोलनको रिपोर्टिङ गर्न गएका स्थानीय पत्रकार बलबहादुर थापा सोमबार विहान १० बजेतिर बसपार्क तिरबाट हानिएको बोटल लागेर घाइते छन्। उनलाई बस समितिका युवाहरूले काँचको बोतलले टाउकोमा हानेका थिए ।
पत्रकार थापाले आन्दोलनको भिडियो खिचिरहेका थिए भने प्रहरी र आन्दोलनकारीले भिडियो नखिच्न आग्रह गरेका थिए । उनीहरूको आग्रह बेवास्ता गर्दै उनले भिडियो खिचिरहेपछि प्रहरीकै अगाडि बस समितिका युवाहरूले उनीमाथि आक्रमण गरेका हुन् ।
स्थानीय प्रशासनले आन्दोलन अनियन्त्रित बन्दै गएपछि ठूलो संख्यामा प्रहरी परिचालन गरेको थियो। आन्दोलनकारी अनियन्त्रित बन्दै गएपछि सशस्त्र प्रहरीलाई थप मद्दतका लागि खटाइएको थियो ।
यसैगरी, सोमवार दिउसो १ बजेतिर आन्दोलनकारीको ढुङ्गा प्रहारबाट एक प्रहरी जवानसमेत घाइते भएको जिल्ला प्रहरी कार्यालय सुर्खेतका प्रवक्ता डीएसपी लक्ष्मण शाहीले जानकारी दिए । मंगलगढी चोकमा दोहोरो भिडन्तपछि आन्दोलनकारीले ढुङ्गा प्रहार गर्दा उनी घाइते भएका हुन । आन्दोल उग्र बनेपछि प्रहरीले चार राउण्ड अश्रुग्यास प्रहार गरेको थियो । मृतक नदीको शव प्रदेश अस्पताल कालागाउँमा राखिएको छ ।
