नेपाली काँग्रेस सुर्खेतले स्थानीय तहको निर्वाचनमा पार्टीलाई अन्तर्घात गरेको भन्दै ६ सय भन्दा बढी संघीय निर्वाचन क्षेत्र नम्बर २ का कार्यकर्ताहरुलाई मात्रै विधान विपरित स्पष्टीकरण सोधेको छ ।
नेपाली काँग्रेसको विधानमा निर्वाचन सम्पन्न भइसकेपछि स्पाष्टीकरण सोध्न नपाईने व्यवस्था गरेपनि सुर्खेत काँग्रेसको अनुशासन समितिले व्यक्ति-व्यक्ति ताकेर लिखित स्पष्टीकरण सोधेको शेखर कोईराला समूहले आरोप लगाएको छ । यस बारेमा यसअघि नै खबरदृष्टिमा समाचार समेत प्रकाशित भइसकेको छ ।
नेपाली कांग्रेसका पूर्व केन्द्रीय सदस्य एवम पूर्व मन्त्री हृदयराम थानीको निर्वाचन क्षेत्र नम्बर दुईलाई केन्द्रीत गरेर स्पष्टीकरण सोधिएपछि संगठन झन दुई चिरामा परेको स्पष्ट भएको थानी निकट एक कार्यकर्ताले बताए ।
थानी उठ्ने गरेको वीरेन्द्रनगरका १४ वडा, बराहताल गाउँपालिका, पञ्चपुरी नगरपालिका र चौकुने गाउँपालिकाका कार्यकर्तालाई मात्रै कार्वाही गर्ने नियत देखिएको भन्दै उनले यसले राम्रो नगर्ने चेतावनी दिए ।
स्थानीय तहको निर्वाचनमा कांग्रेसले पन्चपुरी र बराहतालमा विजय हात पारेको छ भने चौकुनेमा उपाध्यक्ष सहित विजेता बनेको छ । यो क्षेत्र पूर्व मन्त्री स्व. तप्तबहादुर विष्टदेखि शिवराज जोशीसम्मको हो । उक्त क्षेत्रबाट छानी-छानी थानी समूहका कार्यकर्तालाई स्पष्टीकरण सोधिनु आश्चर्यजनक रहेको कार्यकर्ताहरुको गुनासो छ ।
नेपाली काँग्रेसका प्रभावशाली नेता एवम केन्द्रीय उपसभापति पूणर्बहादुर खड्काको निर्वाचन क्षेत्र नम्बर एक हो । यहाँ वीरेन्द्रनगरका दुइ ओटा वडा, भेरीगंगा नपा, गुर्भाकोट, चिङ्गाड गापा, लेकबेशी नपा र सिम्ता गाउँपालिका गरि पाँच पालिका रहेका छन् । यसमध्ये काँग्रेसले गुर्भाकोट र लेकबेशीमा मात्रै जित्न सकेको छ ।
‘सबैभन्दा बढी अन्र्तघात त उपसभापति ज्यूकै क्षेत्रमा उनकै गुटका कार्यकर्ताले गरेका छन् । तर उनीहरुलाई स्पष्टीकरण सोधिएन,’ स्पष्टीकरण सोधिएका वीरेन्द्रनगरका एक कार्यकर्ता भन्छन्, ‘यो भनेको थानी समूहलाई तह लगाउने रणनीति हो । यस्तो रणनीतिले सुर्खेत काँग्रेसको कहिल्यै भलो गर्दैन ।’
निर्वाचन क्षेत्र फरक भएपनि जिल्ला स्तरको नेतृत्व तहमा खड्का र थानी समूहबीच लामो समय देखि चर्को प्रतिस्पर्धा हुँदै आइरहेको छ । नेपाली काँग्रेसको यसपटकको अधिवेशनमा थानी पक्ष जिल्ला नेतृत्वमा शुन्य अवस्थामा पुगेको छ भने कुनैपनि पालिकामा उक्त समूहले स्थानीय तहको निर्वाचनमा उम्मेदवारी दर्ता गराएको थिएन ।
स्पष्टीकरण क्षेत्र नं. २ लाई मात्रै केन्द्रीत गरिएको भन्ने बारेमा प्रतिक्रिया लिन खोज्दा संस्थापन पक्षका नेताहरुले कुरै गर्न चाहेनन् । आगामी निर्वाचनमा प्रदेश तह वा संघमा चुनाव लड्ने चाहना राखेका नेताहरु नेतृत्वमा रहेका कारण मिडियामा नबोल्ने रणनीति अख्तियार गरेको बुझ्न सकिन्छ ।
तर, संस्थापन पक्ष इतर समूहले भने संस्थापन पक्षका यस्ता कदमको कडा प्रतिरोध गर्ने बताइरहेको छ । स्पष्टीकरणको बिरोध गर्न उसले केही दिनभित्रै जिल्ला भेला गर्न लागेको विश्वस्त श्रोतले जानकारी दिएको छ ।
तर, नेपाली काँग्रेस सुर्खेतका जिल्ला सभापति खडक पोखरेलले निर्वाचन क्षेत्र नम्बर एकका कार्यकर्ताहरुलाई मात्रै स्पष्टीकरण नसोधिएको भन्ने कुुरा निराधार रहेको बताए । ‘त्यो वाहियात कुरा हो, उनले भने, ‘दुइ नम्बर भन्दा एक नम्बरका धेरै कार्यकर्तालाई स्पष्टीकरण सोधेका छौं ।’
यद्यपी, उनले स्पष्टीकरण कति जनालाई र कुन आधारमा सोधिएको हो भन्ने खुलाउन चाहेनन् ।
