सुर्खेत । कर्णाली प्रदेशको राजधानी सुर्खेतमा रहेको मानव सेवा आश्रमले एकजना नागरिकको उद्दार गरेको छ । आश्रमले बुधबार राति वीरेन्द्रनगर–३ हिलेखाली नजिकबाट नाम बताउन नसक्ने बेबारिसे नागरिकलाई उद्दार गरेको हो ।
आश्रमले अन्दाजी ५४ वर्षीय पुरुषलाई शारीरिक अवस्था नाजुक भएको र चिसोले कामिरहेको रहेको अवस्थामा उद्दार गरिएको मानव सेवा आश्रम सुर्खेतका संयोजक सुजन गौतमले जानकारी दिए । उनको परिवार र घर कहाँ हो भनेर खोजीकार्य भइरहेको गौतमले बताए ।
उनकाअनुसार सडकमा बेवारिसे अवस्थामा रहेका बालकदेखि वृद्धसम्मका मानिसलाई उद्धार गरी आश्रममा स्वास्थ्योपचार, भोजनलगायत आवश्यक सेवा, सुविधा दिएर राख्ने र रोग निको भइसकेपछि परिवारको जिम्मा लगाउने गरिन्छ ।