सुर्खेत । सुर्खेतको वीरेन्द्रनगरमा ’प्रथम खुल्ला फुटबल तथा बी डिभिजन ब्याटमेन्टन कप’ आयोजना गर्न लागिएको छ । यो प्रतियोगिता वीरेन्द्रनगर नगरपालिका २ नम्बर वडाको आयोजनामा र सामाजिक विकास युवा क्लबको समन्वयमा विजया दशमी र शुभ दीपावलीको अवसरमा हुने भएको हो।
प्रतियोगिता असोज १३ देखि १९ गतेसम्म सञ्चालन हुनेछ। फुटबलमा प्रथम, द्वितीय र तृतीय हुने टिमले क्रमशः ५० हजार, २५ हजार र १५ हजार रुपैयाँ नगद, ट्रफी र प्रमाणपत्र पाउने छन् । यस्तै, ब्याटमेन्टनका लागि पनि प्रथम, द्वितीय र तृतीय हुने टिमले क्रमशः १५ हजार, १० हजार र ५ हजार रुपैयाँ नगद र प्रमाणपत्र प्राप्त गर्नेछन् ।
प्रतियोगितामा उत्कृष्ट प्रदर्शन गर्ने खेलाडीलाई ’म्यान अफ द म्याच’ पुरस्कार र ट्रफी पनि प्रदान गरिने आयोजकले जनाएको छ। सहभागिताका लागि इच्छुक टिमले असोज ६ देखि ११ गतेसम्म दर्ता गर्नुपर्नेछ।
फुटबलका लागि ५ हजार १ सय र ब्याटमेन्टनका लागि १ हजार रुपैयाँ दर्ता शुल्क तोकिएको छ । यस प्रतियोगिताले स्थानीय खेलकुदको प्रोत्साहन र युवा प्रतिभाको विकासमा महत्त्वपूर्ण भूमिका खेल्ने अपेक्षा गरिएको छ ।
