सुर्खेत । भेरीगंगामा बजार अनुगमन गरिएको छ । नगरभित्रका ९६ वटा पसलहरू अनुगमन गरिएको हो । पछिल्लो पटक भेरीगंगा नगरपालिकाले चाडपर्व नजिकिएसँगै बजार अनुगमनलाई तीव्र बनाएको छ । भेरीगंगा नगरपालिका, घरेलु महासङ्घ भेरीगंगा, उद्योग वाणिज्य सङ्घ भेरी र इलाका प्रहरी कार्यालय छिन्चुले संयुक्त रूपमा नगरभित्रका छिन्चु, रामघाट, जहरे र झिङनी बजारमा अनुगमन गरेका हुन् ।
नजिकिँदै गरेको चाडपर्वलाई लक्षित गरी गत बिहीबार, शुक्रवार र शनिवार बजार अनुगमन गरिएको भेरीगंगा नगरपालिकाका प्रमुख प्रशासकीय अधिकृत कृष्णप्रसाद पोखरेलले जानकारी दिए । उनकाअनुसार अनुगमन टोलीले खाद्यान्न, किराना पसल, गोदाम, माछा मासु, तरकारी, फलफूल, मिठाई पसल, होटेल, भेटेरिनरी, मेडिकल हल लगायतमा अनुगमन गरेको थियो ।
चाडपर्वको समयमा व्यापारीहरूले जथाभाबी मूल्य लिने, म्याद गुज्रिएका अखाद्य वस्तुहरू बेच्ने लगायतका समस्या देखिने गरेकाले अनुगमन तीव्र पारिएको अधिकृत पोखरेलले जानकारी दिए । अनुगमनको क्रममा ठुलो मात्रामा हल्का पेय पदार्थ (फेन्टा, स्प्राईट) भेटिएको भेरीगंगा नगरपालिका उद्योग विकास तथा सहकारी शाखा प्रमुख चित्रा डाँगी जानकारी दिइन ।
उनका अनुसार तीन दिनमा अनुमानित चार लाख बराबरको सामान जफत गरिएको छ । छिन्चु बजारमा रहेको श्रद्धा अडर एण्ड सप्लायर्सबाट १ हजार एक सय ९८ बोतल फेन्टा, स्प्राईट र एक सय नौ वटा सोडा फेला पारेर बरामद गरिएको उनले बताइन् । यसका साथै म्याद गुज्रेका खाद्यवस्तु, हल्का पेय पदार्थ विषादी, बिउ बिजन, लेबल नलाएका सामाग्री आगामी दिनमा बिक्री नगर्न सुझाव तथा चेतावनी दिइएको छ ।
त्यस्तै व्यवसाय दर्ता नगरी सञ्चालन गरिएका पसलहरू पनि फेला परेको शाखा प्रमुख डाँगीले बताइन् । त्यस्ता व्यवसायीलाई ७ दिनभित्र नगरपालिकामा उपस्थित हुन निर्देशन दिइएको उनले जानकारी दिइन । भेरीगंगा क्षेत्रभित्र दर्ता नगरी पसल सञ्चालन भएकाहरूका लागि पालिकाको उद्योग विकास तथा सहकारी शाखा दर्ता गर्नसमेत अनुरोध गरिन् ।
त्यस्तै उद्योग वाणिज्य सङ्घ भेरीका अध्यक्ष सोमराज ढकालले अखाद्य वस्तुको बिक्री वितरण र कालोबजारी रोक्नका लागि बजार अनुगमनलाई तीव्र पारिएको बताए । बजारका लागि उपभोक्ता सचेत हुन सके उपभोक्ता ठगिनबाट बच्ने उनले बताएका छन् ।
