फाइल तस्बिर
जाजरकोट । १२ कक्षाको राष्ट्रिय परीक्षाबाट जाजरकोटका केही विद्यार्थी वञ्चित भएका छन्। विद्यालयकै लापरवाही र गैरजिम्मेवारीपूर्ण कार्यले करिब १७ विद्यार्थी परीक्षा दिनबाट वञ्चित भएका हुन्। कुशे गाउँपालिका–२ टालेगाउँस्थित श्री मान्ने ढुंगा माध्यमिक विद्यालयले केही विद्यार्थीको परीक्षा आवेदन फारामसँगै कागजात राष्ट्रिय परीक्षा बोर्डमा नपठाएको पुष्टि भएको छ ।
प्रदेश परीक्षा व्यवस्थापन कार्यालय सुर्खेतका अनुसार विद्यालयले सुरुमा १३६ जना विद्यार्थीको नाम अनलाइनमा दर्ता गरे पनि पछि ११९ जनाको मात्र राजस्व संकलन गरी आवश्यक कागजात बोर्डमा पठाएको देखिएको छ । ती विद्यार्थीहरूको मात्र प्रवेशपत्र आएर परीक्षा दिइरहेका छन् भने बाँकी विद्यार्थीहरू कागजात नपठाइएकै कारण परीक्षा दिनबाट वञ्चित भएका छन् ।
अघिल्लो वर्ष नै कक्षा १२ उत्तीर्ण गरिसकेका एक विद्यार्थीको समेत फारम भरेर बोर्डमा पठाइएको भेटिएको छ । प्रदेश परीक्षा व्यवस्थापन कार्यालय सुर्खेतका सूचना अधिकारी नरेशकुमार भट्टराईका अनुसार त्रुटि भेटिएपछि ती विद्यार्थीको परीक्षा रद्द गरिएको छ । अन्य विद्यार्थीको कागजात किन नपठाएको हो भनेर बुझ्दा विद्यालयले उनीहरूले कागजात नबुझाएको भन्दै पत्र पठाएको उनले बताए ।
तर पीडित विद्यार्थीहरू अनुसार परीक्षा आवेदन फाराम खुलेको केही दिनमै सबै प्रक्रिया पूरा गरी विद्यालयका कर्मचारी घनश्याम सिंहलाई बुझाइएको थियो । ‘फाराम छुट्न नदिन भनेर हामीले पटक–पटक प्रधानाध्यापक सुरेन्द्र बहादुर सिंहलाई समेत आग्रह गरेका थियौं,’ एक विद्यार्थीले भने, ‘तर अन्तिममा हाम्रो फारामसँगै कागजात नै पठाइएनछ, यदि फारामसँग कागजात थिएनन् भने विद्यालयले हामीलाई जानकारी गराउनुपर्थ्यो, एकचोटी पनि कुरा भनिएन र कागजात समेत फारामसँगै बुझाएको भनिएको छ ।’
विद्यार्थीहरूले प्रतिव्यक्ति २ हजार रुपैयाँका दरले राजस्व बुझाएको दाबी गर्दै बिलसमेत नदिएको गुनासो गरेका छन् । ‘हामीले सबै प्रक्रिया पूरा गर्दा पनि परीक्षा दिनबाट वञ्चित हुनुपर्यो, यो सरासर अन्याय हो,’ उनीहरूले भने । स्थानीय वासिन्दा तथा अभिभावकहरूले विद्यालय प्रशासनको लापरवाहीले विद्यार्थीहरूको भविष्यसँग प्रत्यक्ष खेलवाड भएको आरोप लगाएका छन् ।
उनीहरूले दोषीमाथि कडा कारवाही गर्न र पीडित विद्यार्थीलाई न्याय दिन सम्बन्धित निकायसँग माग गरेका छन् । विद्यालयका प्रधानाध्यापक सुरेन्द्र बहादुर सिंहले भने यसघि नै केही कागजात छुटेका कारण केही विद्यार्थीको प्रवेश पत्र नआएको हुनसक्ने बताएका थिए ।
