सुर्खेत । कर्णाली प्रदेश सरकारले प्रदेश स्थापना तथा शहीद दिवस- २०८२ को अवसरमा भोलि (बुधबार) सार्वजनिक बिदा दिने भएको छ । मन्त्रिपरिषद् बैठकको निर्णय बमोजिम प्रदेश स्थापना तथा शहीद दिवसको उपलक्ष्यमा प्रदेशभरका सबै सरकारी कार्यालय तथा सार्वजनिक संघ–संस्थाहरूमा सार्वजनिक बिदा दिइएको हो ।
२३ भदौ २०७२ को मध्यरात प्रमुख चार राजनीतिक दलका शीर्ष नेता सम्मिलित संविधानसभाको विशेष समितिले ६ प्रदेशको सीमाङ्कनसहित संघीयताको खाका सार्वजनिक गरेपछिको विवादले अन्ततः आन्दोलनको रुप लिएपछि कान्छो प्रदेशका रुपमा कर्णाली प्रदेश जन्मिएको थियो ।
प्रदेश प्राप्तिको आन्दोलनमा चार जनाले ज्यानसमेत गुमाएका थिए । आन्दोलन उत्कर्षमा पुगेपछि अन्ततः ४ भदौ २०७२ मा साविक कर्णाली अञ्चलसहित भेरी अञ्चलका सुर्खेत, दैलेख, जाजरकोट र राप्ती अञ्चलका सल्यान, रुकुम–पश्चिम जिल्लालाई समेटेर कर्णाली प्रदेश स्थापना भएको थियो ।
