सुर्खेत । कर्णाली प्रदेश स्तरीय फुटबल प्रतियोगिताको उपाधि जुम्लाले उचालेको छ । शुक्रबार जुम्ला र हुम्लाबीच भएको फाइनल खेलमा जुम्लाले चार गोल गर्दै उपाधि उचालेको हो । प्रतियोगितामा जुम्लाका रुविन भण्डारीले ह्याट्रिक गरे भने जुम्लाका महेन्द्र शाहीले एक गोल गरे । निर्धातिर ९० मिनेटको खेलमा हुम्लाले कुनै पनि गोल गर्न सकेन् ।
तुलनात्मक रुपमा कमजोर मानिएको हुम्ला प्रतियोगिता अवधिभर दबाबमा रह्यो । पहिलो हाफमा एक गोल गरेको जुम्लाले दोस्रो हाफमा तीन गोल थप्यो । २०८१ मा सुर्खेतमा हुने दशौँ राष्ट्रिय खेलकुद प्रतियोगिताका लागि कर्णाली प्रदेशको टिम बनाउन आयोजित छनोट प्रतियोगितामा जुम्लाले सुर्खेतलाई हराउँदै फाइनलमा आफ्नो स्थान सुरक्षित गरेको थियो ।
विजेता र उपविजेता टिमलाई कर्णाली प्रदेशसभा सदस्य पूर्वसामाजिक विकासमन्त्री टेकराज पछाई, प्रदेशसभा सदस्य देवन्द्रबहादुर शाही, प्रमुख जिल्ला अधिकारी जयकुमार घिमिरे लगायतले प्रमाणपत्र, मेडल र टफ्री हस्तान्तरण गरेका छन् । जुम्लाले आगामी मंसिरमा हुने दसौं राष्ट्रिय खेलकुदमा धेरै खेलाडी छनौट हुने अपेक्षा गरेको छ ।
हृयाट्रिककर्ता भण्डारीले घरेलु मैदानमा उपाधि चुम्दा खुसी लागेको प्रतिक्रिया दिए । उनले राष्ट्रिय खेलकुदमा पनि जुम्लाबाट छनौट भएका खेलाडीहरुले उत्कृष्ट प्रदर्शन गर्ने उल्लेख गरे । प्रतियोगिता लक्षित सशस्त्र प्रहरी र नेपाल प्रहरी बाक्लो संख्यामा उपस्थित गराइएको थियो । प्रतियोगिता गत मंगलबारदेखि सुरु भएको थियो ।
