सुर्खेत । जाजरकोटमा ट्याक्टर दुर्घटना हुँदा चारजना घाइते भएका छन् । सरिया लोड गरी खलङ्गा बजारदेखि कालेगाउँतर्फ जाँदै भे २ त १६७३ नम्बरको ट्याक्टर भेरी नगरपालिका–१, बराहथानस्थित आज (बुधवार) बिहान ९ बजेको समयमा दुर्घटना हुँदा चार जना घाइते भएका हुन् ।
घाइते हुनेहरुमा ट्याक्टर चालक कुशे गाउँपालिका–५ बस्ने वर्ष २५ का भिम परियार, भेरी नगरपालिका–४ बस्ने वर्ष २१ का प्रकाश वादी, छेडागाड नगरपालिका–५ बस्ने वर्ष १८ का बालकृष्ण परियार र सोही ठाउँ बस्ने वर्ष १८ का धर्मराज खड्का घाइते भएको जिल्ला प्रहरी कार्यालय जाजरकोटका प्रहरी नायब उपरीक्षक (डिएसपी) पुरुषोत्तम प्रसाद पाण्डेले जानकारी दिए ।
घाइते दुईजनालाई उपचारका लागि जिल्ला अस्पताल जाजरकोटबाट नेपालगञ्ज रिफर गरिएको डिएसपी पाण्डेले बताए । ट्याक्टर ओरालो सडकमै ट्रयाली पल्टिन जाँदा दुर्घटनामा परेको थियो ।
