सुर्खेत । सुर्खेत उद्योग वाणिज्य संघको आसन्न निर्वाचनअघि नेकपा एमाले र माओवादी केन्द्र निकट व्यवसायी संगठनले संघको निर्वाचन प्रक्रियाबाट आफूहरू अलग भएको घोषणा गरेका छन् । संगठनसँग आवद्ध ११ जना उम्मेदवारहरूले विभिन्न पदका लागि दिएका उम्मेदवारी फिर्ता लिएसगै आफुहरु निर्वाचन प्रक्रियामा सहभागि नहुने घोषणा गरेका हुन् ।
वरिष्ठ उपाध्यक्ष पदका उम्मेदवार कलाधर उपाध्याय (केदार)ले वाणिज्य संघको नेतृत्वमा सर्वसम्मत चयन गराउन आफुहरुले उम्मेदवारी फिर्ता लिएको बताए । उनले नेतृत्व तहबाट बारम्बार संवाद र समन्वयको प्रयास गर्दा पनि व्यवहारिक प्रतिबद्धता नदेखिएकाले यस्तो निर्णय लिनुपरेको बताए ।
‘विगतका निर्वाचनहरूमा देखिएको अत्यधिक खर्चिलो, भड्किलो र अस्वस्थ प्रतिस्पर्धाको झल्को यसपटक पनि देखिन थालेपछि अहिलेको जटिल आर्थिक अवस्थामा त्यो अवस्था थप अव्यावहारिक लाग्यो, ‘उपाध्यायले खबरदृष्टिसँग कुरा गर्दै भने, ‘त्यसैले हामीले सामूहिक रूपमा उम्मेदवारी फिर्ता लिएका हौँ।,’
उम्मेदवारी फिर्ता लिने अन्य उम्मेदवारहरूमा प्रेम बहादुर रावत, पूर्ण प्रसाद पाण्डे, ज्ञानेन्द्र बहादुर विश्वकर्मा, अर्जुन जङ शाही, महेन्द्र प्रसाद शर्मा, धन बहादुर चुनारा, टेक बहादुर थापा, रेशम ढकाल, भानुभक्त खड्का र हिमा उपाध्याय छन् ।
उपाध्यायले वाणिज्य संघको निर्वाचनमा सहभागी नहुने स्पष्ट गर्दै आफूहरूलाई साथ र समर्थन गर्ने मतदातालाई पनि मतदान प्रक्रियामा सहभागी नहुन आग्रह गरेका छन् । सुर्खेत उद्योग वाणिज्य संघको निर्वाचन वैशाख ६ गतेका लागि तय गरिएको छ । यसअघि संघको निर्वाचन २०७९ वैशाख ४ गते भएको थियो ।
