सुर्खेत । सुर्खेतको वीरेन्द्रनगर–४ स्थित भैरव मन्दिर परिसरमा भैरव बडिमालिका माताको मूर्ति र त्रिशुल प्राणप्रतिष्ठा कार्यक्रम आगामी असोज ६ गतेदेखि सुरु हुने भएको छ। भैरव देवता धार्मिक समाजको आयोजनामा हुन लागेको यो धार्मिक समारोह सात दिनसम्म सञ्चालन हुने समाजका अध्यक्ष युवराज पन्तले जानकारी दिए।
उनका अनुसार असोज ६ गते मन्दिर परिसरबाट प्रारम्भ गरी कालिका मन्दिर, देउती बज्यै मन्दिर, उत्तरगंगा मन्दिर हुँदै दुर्गा मन्दिर (बाङ्गेसिमल) र अन्ततः भैरव मन्दिरसम्म विशेष विधिपूर्वक प्राणप्रतिष्ठा कर्म सुरु गरिनेछ। कार्यक्रमअनुसार असोज ७ गते अन्नस माताजीलाई अन्न बास, ८ गते मधुपर्क बास, ९ गते मिष्ठान्न वास, १० गते फलादी वास, ११ गते दर्बे वास, १२ गते पुष्प वास, १३ गते ब्राह्मणद्वारा स्वस्थी वाचन र कर्णाली प्रदेशका मुख्यमन्त्री यामलाल कँडेलद्वारा दुर्गा माता मूर्तिको प्राणप्रतिष्ठा हुनेछ।
असोज १४ गते अष्टमी दुर्गा पूजा र १५ गते कन्या पूजन तथा पूर्णाहुतिसहित कार्यक्रम सम्पन्न हुनेछ । अध्यक्ष पन्तले सम्पूर्ण श्रद्धालु भक्तजनलाई धार्मिक लाभ प्राप्त गर्न यो अवसरमा सहभागी हुन आग्रह गरेका छन्।
