जगदिश शाही
सुर्खेत । मध्यपश्चिम विश्वविद्यालयको ग्र्याजुएट स्कुल अफ ह्युम्यानिटिज एण्ड सोसल साइन्सेसअन्तर्गत सामाजिक कार्य, पत्रकारिता तथा आमसञ्चार केन्द्रीय विभागको विभागीय प्रमुखमा त्रिभुवन बुढा क्षेत्री नियुक्त हुनुभएको छ।
शिक्षण तथा शैक्षिक क्षेत्रमा आफ्नो छुट्टै पहिचान बनाउन सफल क्षेत्री विद्यार्थीमाझ लोकप्रिय, सरल र प्रेरणादायी शिक्षकका रूपमा परिचित हुनुहुन्छ। उहाँले लामो समयदेखि विद्यार्थीको शैक्षिक विकाससँगै ज्ञान, सीप र सिर्जनात्मक क्षमताको विकासमा महत्वपूर्ण भूमिका निर्वाह गर्दै आउनुभएको छ।
विश्वविद्यालयको महत्वपूर्ण विभागको नेतृत्व गर्ने जिम्मेवारी प्राप्त गरेसँगै उहाँको नेतृत्वमा विभागको शैक्षिक, अनुसन्धानात्मक तथा प्रशासनिक गतिविधिले थप गति लिने अपेक्षा गरिएको छ। विशेषगरी सामाजिक कार्य, पत्रकारिता तथा आमसञ्चारजस्ता समाजसँग प्रत्यक्ष जोडिएका विषयहरूको गुणस्तरीय अध्ययन–अध्यापन, अनुसन्धान तथा विद्यार्थीको व्यावसायिक दक्षता अभिवृद्धिमा उहाँको भूमिका महत्वपूर्ण हुने विश्वास गरिएको छ।
विद्यार्थीहरूका लागि शिक्षक केवल पाठ्यक्रम पढाउने व्यक्ति मात्र नभई सही बाटो देखाउने मार्गदर्शक र प्रेरणाको स्रोत पनि हुन्। त्यसैले आफ्ना आदरणीय शिक्षक त्रिभुवन बुढा क्षेत्रीले विश्वविद्यालयको महत्वपूर्ण विभागको नेतृत्व गर्ने जिम्मेवारी प्राप्त गर्नुभएकोमा विद्यार्थीहरूमा समेत खुसी र उत्साह देखिएको छ।
उहाँको नियुक्तिले विभागलाई थप व्यवस्थित, विद्यार्थीमैत्री तथा अनुसन्धानमुखी बनाउन सहयोग पुग्ने विश्वास गरिएको छ। साथै उहाँको अनुभव, दक्षता, सकारात्मक सोच र नेतृत्व क्षमताले विभागको शैक्षिक उन्नयनमा महत्वपूर्ण योगदान पुर्याउने अपेक्षा गरिएको छ।
यसै अवसरमा नवनियुक्त विभागीय प्रमुख त्रिभुवन बुढा क्षेत्रीलाई हार्दिक बधाई तथा सफल कार्यकालको हार्दिक शुभकामना व्यक्त गरिएको छ। उहाँको कार्यकाल सफल, उपलब्धिमूलक र प्रेरणादायी रहोस् तथा उहाँको नेतृत्वमा विभागले शैक्षिक, अनुसन्धान र व्यावसायिक क्षेत्रमा थप नयाँ उचाइ हासिल गरोस् भन्ने शुभकामना व्यक्त गरिएको छ।
