सुर्खेत । नेपाल प्रिमियम लिग (एनपीएल) मा उत्कृष्ट खेल प्रदर्शन गरेका क्रिकेटर विपिन शर्मा गृहजिल्ला सुर्खेतमा सम्मानित भएका छन् । एनपीएलमा कर्णाली प्रदेशलाई प्रतिनिधित्व गर्ने टिम कर्णाली याक्सलाई प्लेअफमा पुर्याउँदा विपिनले दिग्गज ब्याटरहरूलाई आफ्नो स्पिनको जादुमा नचाएका थिए ।
बुधबार सुर्खेत उद्योग वाणिज्य संघले शर्मालाई नगद पुरस्कारसहित सम्मान गरेको हो । संघका अध्यक्ष लक्ष्मण कँडेललगायतका पदाधिकारीले नगद पाँच हजार, दोसल्ला र प्रशंसापत्रसहित सम्मान गरेका हुन् । कार्यक्रममा अध्यक्ष कँडेलले खेलकुदको माध्यमबाट कर्णालीलाई राष्ट्रियस्तरमा परिचित गराएकोमा विपिनलाई धन्यवाद दिँदै अन्तर्राष्ट्रियस्तरमा कर्णालीको नाम र गौरव उचो बनाइराख्न शुभकामना दिए ।
सम्मानपछि विपिनले खेलकुदमा राज्यले गरेको लगानी खेर जान नदिने बताउँदै साना उमेरका खेलाडीमा पनि लगानी गर्न आग्रह गरे । कर्णाली याक्सको ट्यालेन्ट हन्टबाट आइकोनिक प्लयेरका रूपमा छानिएका विपिन एनपीएलमा १३ विकेट लिँदै उदीयमान खेलाडी घोषित भएका थिए ।
