काठमाडौं । अख्तियार दुरुपयोग अनुसन्धान आयोगले सशस्त्र प्रहरी बल (एपीएफ) नेपालका प्रहरी निरीक्षक हरिचन्द्र ढकालसहित २ जनाविरुद्ध भ्रष्टाचार मुद्दा दायर गरेको छ । रुपन्देहीस्थित बोर्डर आउट पोस्ट (बीओपी) मझगाँवाका कार्यालय प्रमुख समेत रहेका सशस्त्र प्रहरी निरीक्षक ढकालसहित २ जनाविरुद्ध शुक्रबार विशेष अदालतमा मुद्दा दायर गरिएको आयोगले जनाएको छ ।
आयोगका प्रवक्ता राजेन्द्रकुमार दाहालका अनुसार सशस्त्र प्रहरी जवान यामबहादुर खत्री १५ हजार रुपैयाँ घुससहित पक्राउ परेका थिए । खत्रीले भारतबाट भन्सार छली अवैधरूपमा कपडा तथा किराना सामान ल्याउने कार्यमा सहजीकरण गरिदिने भनी सेवाग्राहीसँग १५ हजार रुपैयाँ लिएका प्रवक्ता दाहालले जानकारी दिए ।
त्यसपछि थप अनुसन्धानका क्रममा प्रहरी निरीक्षक ढकाल र सशस्त्र प्रहरी जवान खत्री समेतको आपसी मिलोमतो तथा योजनामा भारतबाट दुर्गौलिया नाका हुँदै नेपालमा घरायसी सामान ल्याउने क्रममा सहजीकरण गरिदिने प्रयोजनका लागि घुस लिएको पाइएको थियो । उनीहरूविरुद्ध १५ हजार रुपैयाँ बिगो कायम गरी कैद र जरिवाना दुवै सजायको माग गरिएको आयोगले जनाएको छ ।
