बैशाख ३, सुर्खेत
कम क्षतिमै कर्णाली प्रदेशमा केपी ओली टिमले एमाले पार्टीभित्र वर्चस्व कायम गरेको छ । माधवकुमार नेपाल टिमको नेतृत्व गर्दै प्रदेशमा टिमगत भागवण्डामा दावी गर्ने समूहका नाईके प्रकाश ज्वाला लगायतका अन्य ४ जना कर्णाली प्रदेश सभामा ’फ्लोर क्रस’ गरेको अभियोगमा साधारण सदस्यवाटै निस्कासनमा पर्नेछन् ।
कर्णाली प्रदेशमा माधवकुमार नेपाल समूह अन्य प्रदेशको तुलनामा सशक्त रुपमा रहेको थियो । प्रदेश सभामा वहुमत स्थानमा विजयी भएपनि यमलाल कडेल माधव समूहका केही सांसदहरूको समर्थनको कारण एमाले संसदीय दलको नेतामा निर्वाचित भएका थिए ।
दलको नेतामा निर्वाचित हुन नपाएपछि प्रकाश ज्वाला कडेलविरुद्धको अभियानमा सुक्ष्मरुपले लागिरहे। ताकमौकामा रहेका ज्वालाले यसपटक कँडेललाई घुडा टेकाउने भन्दै आफ्नै पार्टीका नेता कँडेललाई घात गर्ने निर्णय गरे। २०७८ साल वैसाक ३ गते मुख्यमन्त्री महेन्द्रवहादुर शाहीलाई विश्वासको मत दिए ।
शुक्रबार प्रदेश सभामा विश्वासको मत लिने क्रममा एमालेका ४ जनाले फ्लोर क्रस गरेर मुख्यमन्त्री शाहीको सरकार वचाईदिएका छन् । एमाले कर्णाली प्रदेशका चार सांसदले पदीय र आर्थिक लेनदेनका आधारमा माओवादी केन्द्रको सरकार जोगाईदिएको उनीहरूमाथि गम्भीर आरोप लागेको छ ।
यश घटनाले नेकपा एमाले कठोर बनेको छ । पार्टीको ह्वीप उलंघन गर्दै फ्लोर क्रस गरेर कर्णाली प्रदेशका मुख्यमन्त्री महेन्द्रबबहादुर शाहीको सरकार जोगाइ दिएपछि एमाले नेतृत्व कठोर बनेको हो ।
माओवादी केन्द्रका अध्यक्ष पुष्पकमल दाहाल, प्रचण्ड र एमाले नेता माधव नेपालबीचको केन्द्रमा साँठगाँठ र प्रदेशमा आर्थिक चलखेलपछि एमालेका चार सांसद बिक्री भएको एमाले सांसद दानसिं परियार दाबी गर्छन् ।
कर्णालीको यो घटनालगत्तै एमाले महासचिव इश्वर पोखरेल, प्रवक्ता प्रदीप ज्ञवाली र स्थायी कमिटीका सदस्य शंकर पोखरेलले कडा प्रतिक्रियासहित कठोर कदम चाल्ने वताएका छन् भने एमाले कर्णाली प्रदेश संसदीय दलले चारै जना सांसदहरुलाई पार्टीको साधरण सदस्यसमेत नरहने गरी कार्वाहीको सिफारिश गरेको छ ।
एमाले महासचिव इश्वर पोखरेलले कर्णाली प्रकरण क्षम्य नहुने बताए । ‘कर्णालीमा ह्वीप उल्लंघन गर्ने सांसदमाथि तत्कालै कारवाही अघि बढ्छ,’ महासचिव पोखरेलले भने, ‘यो कुरालाई पार्टीले गम्भीर रुपमा लिएको छ । विधान र कानुन बमोजिम सम्बन्धित व्यक्तिहरु कारवाहीमा पर्छन् ।’
एमालेको संशोधिन बिधानले प्रदेशसभाका सदस्यहरुलाई कारवाही गर्ने अधिकार अध्यक्ष केपी शर्मा ओलीलाई नै दिएको छ । विधान र ऐनका प्रक्रिया पूरा गरेर प्रकाश ज्वाला, कुर्मराज शाही, अम्बर बहादुर थापा र नन्दसिंह बुढालाई प्रदेशसभा सदस्यबाट पदमुक्त गर्ने एमालेले जनाएको छ । यस्तै प्रवक्ता प्रदीप ज्ञवालीले पनि कर्णालीको अराजकतालाई क्षमा नदिने बताईसकेका छन् ।
लुम्बिनी प्रदेशका मुख्यमन्त्री समेत रहेका स्थायी कमिटी सदस्य शंकर पोखरेलले कर्णाली घटना समानान्तर कमिटी गठनको परिणाम भन्दै अव सचेत बन्न कार्यकर्ता पंक्तिलाई आह्वान गरेका छन् ।
‘समानान्तर गतिबिधिको गन्तब्य कर्णालीको जस्तै हुने हो, समयमै सचेत बनौं, पार्टी र आन्दोलनको समय रक्षाका लागि निशर्त पार्टी काममा जुटौं,’ मुख्यमन्त्री पोखरेलले एक स्टाटस लेख्दै भने ।
