सुर्खेत । वीरेन्द्रनगरमा लागुऔषधसहित चार जना पक्राउ परेका छन् । पक्राउ पर्नेमा वीरेन्द्रनगर नगरपालिका–११ बस्ने वर्ष २८ का हर्कबहादुर खनेल, वर्ष २२ का टेकबहादुर सुनार, वर्ष ४२ का शङ्कर बादी र वर्ष २१ क राजन दमाई रहेका छन् ।
उनीहरुलाई बिहीबार साँझ वीरेन्द्रनगर–११, सुब्बाकुनाबाट पक्राउ गरिएको जिल्ला प्रहरी कार्यालय सुर्खेतले जनाएको छ । उनीहरूलाई शङ्कास्पद अवस्थामा फेला पारी शरीर तथा घर कोठामा खानतलासी गर्दा प्लास्टिकसहित २ ग्राम २ सय ३० मिलिग्राम ब्राउन सुगरजस्तो देखिने धुलो पदार्थ फेला पारेको जिल्ला प्रहरी कार्यालय सुर्खेतका प्रहरी उपरीक्षक रुपेश खड्काले जानकारी दिए । पक्राउ परेका उनीहरु चारैलाई नियन्त्रणमा लिएर थप अनुसन्धान भइरहेको प्रहरीले जनाएको छ ।
