जगदिश शाही
दैलेख ।चाडपर्वका अवसरमा देउसी–भैलो खेलेर सङ्कलन गरिएको रकम सामाजिक सेवामा खर्च गर्दै श्री कञ्चन कर्णाली युवा क्लबले सामाजिक उत्तरदायित्वको उदाहरण प्रस्तुत गरेको छ ।
क्लबका अध्यक्ष नरेश खड्काको नेतृत्वमा गएको टोलीले दुल्लु नगरपालिका–५ निवासी युवराज न्यौपानेका छोरा डेभिड न्यौपाने र दिलीप थापाका छोरा दियान्स थापालाई नगद १० हजार १० रुपैयाँ सहयोग हस्तान्तरण गरेको हो ।
देउसी–भैलोबाट सङ्कलित रकम मनोरञ्जनमा मात्र सीमित नराखी सामाजिक सेवामा सदुपयोग गर्ने उद्देश्यले सहयोग गरिएको क्लबले जनाएको छ । चाडपर्वका अवसरमा सङ्कलित रकमलाई मानवीय सहयोगमा परिचालन गर्ने क्लबको पहलले सामाजिक सेवाप्रतिको युवाहरूको जिम्मेवारीलाई समेत उजागर गरेको छ ।
क्लबका अध्यक्ष खड्काले समाजसेवा, मानवीय सहयोग र सकारात्मक सामाजिक रूपान्तरणका लागि आफू र आफ्नो नेतृत्वमा रहेको क्लब सदैव समुदायसँगै रहने प्रतिबद्धता व्यक्त गरेका छन् ।
समाजमा आवश्यक पर्ने हरेक सकारात्मक कार्यमा क्लबको साथ, सहयोग र सहभागिता निरन्तर रहने उल्लेख गर्दै उनले बोलीमा मात्र सीमित नभई कर्ममार्फत समाजमा सकारात्मक परिवर्तन ल्याउन चाहेको बताएका छन् ।
सेवा, सहयोग र सामाजिक रूपान्तरणको यात्रामा क्लब सदैव समुदायको साथमा रहने अध्यक्ष खड्काको भनाइ छ ।
