जगदिश शाही
काठमाडौं । नक्कली भुटानी शरणार्थी प्रकरणमा दोषी ठहर भई कैद सजाय भोगिरहेका पूर्वउपप्रधानमन्त्री टोपबहादुर रायमाझी जेलमुक्त भएपछि राष्ट्रिय प्रजातन्त्र पार्टी (राप्रपा) का सांसद ज्ञानेन्द्र शाहीले सरकारमाथि प्रश्न उठाएका छन्।
रायमाझी बिहीबार ज्येष्ठ नागरिकसम्बन्धी कानुनी व्यवस्थाअनुसार कैद छुट पाएपछि डिल्लीबजार कारागारबाट रिहा भएका हुन्। उनी ६५ वर्ष उमेर पुगेपछि कानुनबमोजिम २५ प्रतिशत कैद छुट पाउँदै जेलमुक्त भएका हुन्।
रायमाझी रिहा भएपछि सांसद शाहीले संसद्मा भ्रष्टाचारीलाई कारबाही गर्ने र कसैलाई नछोड्ने भन्दै भाषण गर्नेहरू अहिले सत्तामा हुँदा पनि थप अनुसन्धान र कारबाहीको प्रक्रिया अघि नबढेको भन्दै प्रश्न गरेका हुन्।
उनले प्रश्न गरेका छन्, ‘थप अनुसन्धान र कारबाहीको प्रक्रिया कहाँ पुग्यो ? नयाँ फाइल किन तयार भएन? दोषीमाथि थप कारबाही किन भएन ?’
शाहीले संसद्मा भ्रष्टाचारविरुद्ध चर्को अभिव्यक्ति दिनेहरू सत्तामा पुगेपछि थप अनुसन्धान र कारबाहीको अवस्था के भयो भन्ने विषयमा जवाफ मागेका छन्।
रायमाझीको रिहाइ ज्येष्ठ नागरिकसम्बन्धी कानुनी व्यवस्थाअनुसार भएको हो। तर, शाहीले उठाएका प्रश्नले भ्रष्टाचारका प्रकरणमा थप अनुसन्धान, नयाँ मुद्दा र दोषीमाथिको कारबाहीको अवस्थाबारे राजनीतिक वृत्तमा बहसलाई पुनः सतहमा ल्याएको छ।
