सुर्खेत । प्रमुख प्रतिपक्षी दल नेकपा एमालेको अवरोधपछि कर्णाली प्रदेशसभाको बुधबारको बैठक स्थगित भएको छ । एमालले आर्थिक मामिला तथा योजनामन्त्री वेदराज सिंहले पेस गरेको बजेटमाथिको छलफलमा मुख्यमन्त्री र अर्थमन्त्रीले ‘बजेट पैत्रिक सम्पत्ति’ बाँडे जसरी बाडेको आरोप लगाउँदै विरोध जनाएपछि बैठक स्थगित भएको हो ।
आज प्रदेशसभाको १६ औँ बैठकमा मन्त्रालयगत बजेटमाथि छलफल गर्ने कार्यतालिका रहेको थियो । तर, सदन सुरु भएलगत्तै एमाले प्रमुख सचेतक टेकराज पछाईले ‘बजेट पैत्रिक सम्पत्ति’ बाँडे जसरी बाँडिएको र यसबाट प्रदेशको विकास र परिवर्तन सम्भवन नहुने बताएका थिए ।
बजेटमा पूर्ण रुपमा बिचौलिया प्रवेश गरेको बताउँदै सचेतक पछाईले बजेट निर्माणमा योजना आयोगबाट नै बार्गेनिङ भएको र आयोगले बजेट निर्माणमा दबाब दिने कर्मचारीलाई कारबाही गरेपनि नाम गोप्य राखेको भन्दै आपत्ति जनाएका थिए ।
लगत्तै एमालेले कार्यसूचीमै प्रवेश गर्न नदिएर सदन अवरोध गरेको थियो । सभामुख नन्दा गुरुङले पटक–पटक सभा सञ्चालनमा सहयोग गर्न आग्रह गर्दा पनि नमानेपछि आधा घण्टाका लागि बैठक स्थगित भएको थियो । तर,फेरि विशेष कारणवस् बैठक बिहीबार दिउँसो १ बजे बस्ने गरी स्थगित भएको प्रदेशसभा सचिव जीवराज बुढाथोकीले जानकारी दिए ।
