सुर्खेत । पूर्व राष्ट्रपति विद्यादेवी भण्डारीले लोकतन्त्रमा देश र जनताको उन्नति, प्रगतिका लागि दलहरू बलियो हुनुपर्ने बताएकी छन् । सुर्खेतको वीरेन्द्रनगरमा सोमबार पाँच शय्याको महिला तथा बालबालिका नगर अस्पतालको उद्घाटन गर्दै पूर्व राष्ट्रपति भण्डारीले देशको राजनीति ठिक ढंगले अघि बढाउन पनि दलहरू बलियो बन्नुपर्ने बताएकी हुन् ।
उनले लोकतन्त्रका तत्त्वहरू भनेको राजनीतिक दलहरू भएकाले दलहरू कमजोर भएमा देश कमजोर हुने बताइन् । उनले दलहरूले निश्चित आ–आफ्नो मूल्य मान्यता र आर्दश बोके पनि देश र जनताका लागि राजनीतिक पार्टीहरूले सिद्धान्तनिष्ठ रुपमा कर्तव्य पुरा गर्न आग्रह गर्नुहुँदै दलहरू पूर्वाग्रहबाट माथि उठ्नुपर्ने बताइन् ।
पूर्व राष्ट्रपति भण्डारीले आजका बालबालिका परिवार, समाज र राष्ट्रको जिम्मेवारी बहन गर्ने भविष्यका कर्णधार भएको उल्लेख गर्नुहुँदै महिला तथा बालबालिकाको क्षेत्रमा सोचेजस्तो प्रगति हुन नसकेको उल्लेख गरिन् ।
उनले मातृ शिशु स्वास्थ्य कार्यक्रमलाई प्रभावकारी बनाउन वीरेन्द्रनगर नगरपालिकाको लगानीमा सञ्चालनमा ल्याइएको ५ शय्याको महिला तथा बालबालिका अस्पताललाई सेवा सुविधा विस्तार गरी ५ सय शय्यासम्म पुर्याउन आग्रह गरिन् ।
