रुकुम पश्चिम । रुकुम पश्चिमको मुसिकोट नगरपालिका वडा नं १४ को श्री प्रभात माध्यामिक विद्यालयमा एक दिने स्वास्थ्य शिविर सम्पन्न भएको छ । मुसिकोट नगरपालिका र मानव विकास तथा सामुदायिक सेवाअन्तर्गत चौरजहारी अस्पताल र मेहर परियोजनाको संयुक्त आयोजना तथा आर्थिक सहयोगमा निःशुल्क स्वास्थ्य शिविर सम्पन्न भएको हो ।
शिविरमा चौरजहारी अस्पतालका प्रशासक डिलबहादुर गिरी र हाडजोर्नी विशेषज्ञ डाक्टर निम्रोद सुब्बासहित १८ जना स्वास्थकर्मीको टोली खटिएको परियोजना संयोजक बासुदेव सापकोटाले बताए ।
उक्त शिविरबाट भिडियो एक्सरे, रक्त समूह जाँच, गर्भ जाँच, नाक, कान, घाँटी, तल्लो पेट दुख्ने, ज्वरो, रुघाखोकीजस्ता विभिन्न समस्या भएका ३ सय ६० जना महिला र २ सय १ जना पुरुष गरी जम्मा ५ सय ६१ जनाले सेवा लिएको चौरजहारी अस्पतालका मेडिकल निर्देशक एवम् हाडजोर्नी विशेषज्ञ डा निम्रोद सुब्बाले जानकारी दिए ।
जटिल समस्या भएकाहरुलाई भने अस्पताल रिफर गरिएको उनले बताए । साथै शिविरबाट १२ जना अपाङ्गता भएका व्यक्तिहरुले पनि सेवा लिएका थिए ।
