सुर्खेत । जुम्लाबाट बढ्दै गएको काँचो स्याउ निर्यात रोक्न सिफारिस अनिवार्य गरिएको छ । कर्णाली प्रदेशसभाका सदस्यहरूले काँचो स्याउ बिक्रीवितरण रोक्न माग गरेपछि भूमि व्यवस्था, कृषि तथा सहकारी मन्त्री भीमप्रकाश शर्माले जिल्ला प्रशासन कार्यालय र कृषि विकास कार्यालय जुम्लालाई काँचो स्याउ निर्यातमा रोक लगाउन निर्देशन दिएका हुन् ।
मन्त्री शर्माको निर्देशनबमोजिम बुधबार कृषि विकास कार्यालय जुम्लाले स्याउ निर्यातमा अनिवार्य सिफारिस लिनुपर्ने निर्णय गरेको हो । अपरिपक्व अवस्थामै स्याउ जिल्ला बाहिर निर्यात भई जुम्ली स्याउको महत्व घट्दै जान थालेपछि स्याउ निर्यातमा सम्बन्धित निकायको सिफारिस अनिवार्य लिनुपर्ने भएको छ ।
साउनमा पाक्ने गाला, चक्लेटीलगायतका स्याउका लागि कृषि विकास कार्यालय तथा सम्बन्धित गाउँपालिका अन्तर्गतको कृषि शाखाबाट सिफारिसका आधारमा मात्रै निर्यात हुनेछ ।
यस्तै, डेलिसियस, रेड डेलिसियस लगायतका जातका स्याउका लागि आउँदो भदौ १० गतेपछि प्राविधिकहरूको सिफारिसका आधारमा मात्रै टिप्न र निर्यात गर्न पाइने निर्णय भएको छ । जुम्लामा ४ हजार २ सय ५० हेक्टरमा स्याउ खेती भइरहेको कृषि विकास कार्यालय जुम्लाको तथ्यांकमा उल्लेख गरीएको छ ।
