सुर्खेत । सुर्खेतको वीरेन्द्रनगर–१० दीपनगर नजिकै दुई वटा मोटरसाइकल एक आपसमा ठोक्किँदा चार जना घाइते भएका छन् । वीरेन्द्रनगरको पदमपुरचौकबाट घुस्रातर्फ जाँदै गरेको कर्णाली प्रदेश ०२००१ प ४६०७ नम्बरको मोटरसाइकल र विपरीत दिशाबाट आउँदै गरेको कर्णाली प्रदेश ०२००१ प ८६८७ नम्बरको मोटरसाइकल एकआपसमा ठोक्किँदा चार जना घाइते भएका हुन् ।
घाइते हुनेहरूमा दैलेख गुराँस गाउँपालिका–८ बस्ने वर्ष १८ का अनिल केसी, चिङ्गाड गाउँपालिका–५ बस्ने वर्ष १७ का भक्तराज केसी, वीरेन्द्रनगर–१० बस्ने वर्ष २२ का अनिल चौधरी र सोही ठाउँ बस्ने वर्ष २२ का दुर्गे नेपाली रहेको जिल्ला प्रहरी कार्यालय सुर्खेतका एसपी एवम् प्रहरी उपरीक्षक रुपेश खड्काले जानकारी दिए ।
उनकाअनुसार उनीहरूको हात र खुट्टा चोट लागेको र अवस्था सामान्य रहेको छ । घाइतेहरूलाई उपचारका लागि प्रदेश अस्पताल कालागाउँ लगिएको र दुर्घटनामा परेका दुवै मोटरसाइकल प्रहरीले नियन्त्रणमा लिएर अनुसन्धान गरिरहेको प्रहरीले जनाएको छ ।
