सुर्खेत । नेपाल प्रिमियर लिग (एनपीएल) क्रिकेटको अन्तिम लिग खेल आज सोमबार हुँदैछ । कीर्तिपुरस्थित टियु क्रिकेट मैदानमा बिहान ९ बजे सुदूरपश्चिम रोयल्स र कर्णाली याक्सबीच प्रतिस्पर्धा हुँदैछ । यो खेलपछि शीर्ष चार स्थानमा रहेर प्लेअफ पुग्ने टोलीको टुङ्गो लाग्नेछ ।
शीर्ष दुईमा रहेर पहिलो क्वालिफायर खेल्ने र एलिमिनेटर खेल्ने समीकरण पनि तयार हुनेछ । सुदूरपश्चिम, जनकपुर बोल्ट्स र चितवन राइनोज प्लेअफ पुगिसकेका छन् । सुदूरपश्चिम ६ खेलबाट १० अंकका साथ शीर्ष स्थानमा छ । जनकपुर बोल्ट्स ७ खेलबाट १० अंक जोडेर दोस्रोमा छ । सुदूरको नेटरनरेट राम्रो रहेकोले बोल्ट्स भन्दा अघि रहेको हो ।
चितवन, कर्णाली र काठमान्डु गुर्खाजको समान ८ अंक छ । चितवन र काठमान्डुले सबै ७ खेल खेलिसकेका छन् । ८ अंक हुने तीन टिम मध्ये नेटरनरेटका आधारमा अघि रहेपनि चितवनले प्लेअफमा स्थान बनाएको हो ।
