सुर्खेत । कर्णाली प्रदेश सरकारको मन्त्रिपरिषद्को बैठक आज शुक्रबार दिउँसो ३ बजे बसेको बैठकले विभिन्न निर्णयहरू गरेको छ । बैठकले स्थानीय सेवा सम्बन्धी पुरानो विधेयक फिर्ता लिँदै नयाँ संशोधन विधेयक पेश गर्ने निर्णय गरेको छ ।
गत चैत ११ गते दर्ता गरिएको ‘स्थानीय सेवा (गठन तथा सञ्चालन) ऐन, २०८१ लाई संशोधन गर्न बनेको विधेयक’ फिर्ता लिने निर्णय गरिएको कर्णाली प्रदेश सरकारका प्रवक्ता तथा भूमि व्यवस्था, कृषि तथा सहकारी मन्त्री विनोद शाहले जानकारी दिए । उनले सोही विषयमा नयाँ संशोधन विधेयक प्रदेश सभामा पेश गर्न स्वीकृति प्रदान गरिएको बताए ।
बैठकले ‘कर्णाली प्रदेश ससर्त अनुदान सम्बन्धी कार्यविधि, २०८२’ स्वीकृत गर्ने निर्णय पनि गरेको छ । यसका साथै, ‘कर्णाली प्रदेश जीवनाशक विषादी व्यवस्थापन सम्बन्धमा व्यवस्था गर्न बनेको विधेयक, २०८१’ लाई प्रशासन तथा विधेयक समितिबाट प्राप्त परिमार्जनसहित प्रदेश सभामा पेश गर्न स्वीकृति दिने निर्णय भएको प्रवक्ता शाहले जानकारी दिए ।
