सुर्खेत । कालीकोटकी एक सुत्केरी महिलाको हेलिकप्टरद्वारा उद्धार गरिएको छ । खाँडाचक्र नगरपालिका १० की २० वर्षिया विमला गोरालको हेलिकप्टरमार्फत उद्धार गरिएको हो ।
उनी स्वास्थ्यचौकी पाखामा सुत्केरी भएकी थिइन् । सुत्केरीपछि शरीरमा रगतको मात्रा घट्दै गएको र रगत बग्न नरोकिएपछि नेपाली सेनाको हेलिकप्टरबाट उद्धार गरी उनलाई प्रदेश अस्पताल कालागाउँ सुर्खेत ल्याइएको छ ।
प्रमुख जिल्ला अधिकारी जोरासिंह माझीले समयमै उद्धार भएकाले सुत्केरी गोराल र बच्चाको ज्यान जोगिएको बताए । स्वास्थ्यचौकी पाखाका इन्चार्ज नयाँबहादुर बिष्टले अस्पतालमा छोराको जन्म नर्मल भए पनि ४२ हप्ता नाघिसकेका कारणले आमाको पाठेघरमा इन्जुरी भएकाले रगत बग्न नरोकिएको बताए ।
गोरालको शरीरमा रगतको मात्र ८ प्वाइन्ट मात्र थियो । रगत बग्न समेत नरोकिएपछि आपतकालीन हेलिकप्टरमार्फत उद्धार गरिएको चिकित्सकको भनाइ छ । अहिले गोराल खतराबाट मुक्त रहेको चिकित्सकले बताएका छन् ।
